नेचुरल सहकारीले सदस्यलाई २५ हजारसम्म तीन महिनाको लागि सापटी दिने
जोरपाटीमा मुख्य कार्यालय रहेको नेचुरल बचत तथा ऋण सहकारी संस्थाले सदस्यलाई २५ हजार रुपैयाँसम्म सापटी दिने भएको छ ।
औषधी, उपचार र खाद्यान्न खरिदको लागि अत्यावश्यक परेमा सदस्यले २५ हजार रुपैयाँसम्म सापटी पाउने संस्थाले जनाएको छ । उक्त सापटी रकम अवस्था हेरेर तीन महिनाभित्र र्फिता गराउनु पर्ने संस्थालाई प्रमुख कार्यकारी सञ्चालक विकल्प पाठकले जानकारी दिनुभयो ।
‘लकडाउनको समयमा सदस्यलाई पर्ने सक्ने समस्यालाई मध्येनजर गर्दै २५ हजार रुपैयाँसम्म सापटी दिने निर्णय गरेका हौं’, प्रमुख पाठकले भन्नुभयो, ‘अहिलेको अवस्था नै यस्तै छ, जो कोहीलाई पनि समस्या पर्न सक्छ । त्यसैलै पैसा अभाव भएमा सापटी दिने निर्णय गरेका हौं ।’ नेचुरल सहकारी सदस्यप्रति सधै जिम्मेवार रहेको पाठक बताउनुहुन्छ । सदस्यहरुलाई परेको हरेक समस्यामा समाधान गर्न नेचुरल सहकारी प्रतिवद्ध रहेको पनि पाठकको भनाई छ । कार्यालयसम्म आएर सेवा लिन नसक्ने अवस्थामा सदस्यकै घरमा पुगेर सेवा प्रदान गरिरहेको समेत पाठकले बताउनुभयो ।
संस्थाले सातामा चार दिन कार्यालयबाटै पनि सेवा प्रवाह गरिरहेको छ । आईतबार शाँखु सेवा केन्द्र, सोमबार मुख्य कार्यालय, मंगलबार काडाँघारी सदस्य सम्पर्क कार्यालय र बिहीबार नयाँबजार सेवा केन्द्रबाट सेवा प्रवाह गर्दै आएको प्रमुख पाठकले बताउनुभयो ।
संस्थाले हाल दुई घण्टा (बिहान १० बजेदेखि १२ बजेसम्म) मात्र कार्यालयबाट सेवा प्रवाह गरिरहेको छ । संस्थाको एटिएम, मोबाईल बैंकिङ र ई–बैकिङबाट भने २४ सै घण्टा सेवा लिन सकिने संस्थाले जनाएको छ ।
यसका साथै संस्थाले कोरोना भाईरसबारे सदस्यलाई जनचेतना जगाउँदै आएको छ । एसएमएस, सामाजिक सञ्जाल र सदस्यलाई प्रत्यक्ष भेटेर पनि जनचेतना फैलाउँदै आएको छ ।
कोरोना भाईरसको रोकथाम, उपचार र राहत वितरणको लागि स्थानीय तहलाई समेत संस्थाले सहयोग गरेको थियो ।
